عشرة دلخدمات الأباء والامهات المغاربة مكيفهموهومش

ماشي كلشي باغي يكون دكتور ومحامي ومهندس يفرح والديه، هد المهن اللي اي أب وأم كيكرروها فطوفولتنا.

هد الجيل خدى منعطف جديد وفريد وجريئ ونسا أنه الوالدين محال تايفهمو شكيخدمو و أاش قراو، فهد الائحة غنكتب على عشرة دلخدمات الأكثر تعقيدا والغير المفهومة عند والدينا اللي من الكوكب المجاور :

• مبرمج أنترنيت : دبا كتجربة شخصية نهار بغيت نتزوج والأب سولني على خدمة راجلي قلت لو مبرمج أنترنيت وبعد ساعات فالشرح والتعب ورغم أن الأب ديالي واعي طريت نقليه خدام فبنكة حيت عرفت غيقلي واش عندو سيبير ولا؟ فكرة انسان يحقق الربح من كومبيوتر محمول شوية صعيب يفهما واحد حياتو كامل خدام بيدو باش يجيب الدرهم، وفشكل يفهم خفايا هداك الجهاز.

• أخصائي نفسي/ أخصائي علم نفس إجتماعي : وحيتاش هد الائحة ماجا من تجربة وواقع معاش، وحيتاش انا طالبة لعلم الاجتماع راه لحد الساعة الواليد كيقولي شنو هو علم لاجتماع؟ واش تا الاجتماعات عندا علم؟ واش غتداوي لحمقا؟ واش غتبقى تكتبلنا دوى؟ كتقرى على الحماق … بلاا منطول راه كابوس تختار دراسات وخدمة والديك مافهمنهاش.

• رسام/ديزاينر/مصور : اول حاجة غيقولو لك واش غتخلص. راه هدي غا هواية، شوفلك حرفة تانية هد شي مموكلش لخبز فلمغريب، الوالدين اللي خلقو فجيل السبعين والتمانين راه ماشي عمرهم شافو مصور او رسام ولكن راه فديك الجيل راه قليل بجهد تلاقى واحد قرا وقرر بخدم مصور احترافي او رسام او مصمم انفوغرافي اللي محال يفهموها تا هيا، يعني خدماتك عندهم هواية او عمل ثانوي وغير كامل.

• مهندس معلموميات : ماشاء الله ولدي موهنديز …بقات فديالااش الحاجة … بلاا متعقدو لأمور وخليهم فرحانين بكم كمهنديزين هههه.

• مصمم أزياء : يقدر يقلك خياط فصال، كتبيع وتشري فلحوياج تترسم مونيكات … وما خفي كان أعظم.

• ماناجر /وكيل أعمال : حيتاش وكيل الأعمال مكيديرش حاجة وحدة وكيدير كلشي راه يقدر الوالدين يفهموها كمرافق شخصي البوكينغ التنظيم الظهور العلني السوسيال ميديا كلها حاجات كيسيطر عليها وكيل الا عمال د ناس معروفين او دشركات وحظا سعيدا تفهم والديك شكتخدم.

• مخرج(ة)/ممثل(ة)/راقص(ة) : كلمة وحدة فهد الفئة غتسمعا “عيب”.

• متخرجي المعهد الموسيقي : أعزائنا الطبالة الغيتاريس موالين الناي …. تقدر تكون بيانيست كبير وكتحلم تخدم فأوركستر سمفونية او تدخل مع فرقة موسيقية او او او…. ولكن راه وخا يكون باك وزير الثقافة راه علاا بالو تلعب …

• فيزيائي / العلوم الطبيعية / النووي/ الكيمياء : كتلقى راصك كتقلهم أنا أستا ذ دلحساب حيت وخا تدير تجارب تأهلك لنوبل فلعلوم راه ميفهموكش.

• ريسيبسون / الاستقبال / مظيف طيران /شاف … : ولدي خدام فطيارة ، ولدير مدير د أوطيل ولدي طياب…